IGIHEMBWE CYA MBERE CY'UMWAKA W'AMASHURI 2012 CYARANGIYE NEZA
Haba ku cyiciro cy'amashuri abanza cyangwa se ayisumbuye, kuwa 30 Werurwe guhera sa tatu hatanzwe indangamanota ku banyeshuri. Uwo muhango, umuyobozi wa G.S. BUTARE CATHOLIQUE NIZEYIMANA Jean Damascène yashimye abanyeshuri bagize umusaruro mwiza aboneraho no kugaya abatarakoze neza ndetse na bake baranzwe n'imyifatire mibi muri iki gihembwe kirangiye. Yanashimye kandi abarezi mu ngeri zose umurava n'ubwitange byabaranze.
Ikindi cyagaragaye ni uko ababyeyi batitabiriye uwo muhango neza nk'uko bisabwa. Turashishikariza ababyeyi kujya bitabira igikorwa cyo gutanga indangamanota kuko usanga ubwitabire bukiri hasi cyane.(Umuyobozi ushinzwe amasomo)
ISHURI RY'INCUKE (MATERNELLE)
Ishuri ry'incuke (maternelle) rya "G.S. BUTARE CATHOLIQUE" ryashoje imirimo yaryo y'igihembwe cya mbere umwaka w'amashuri 2012 kuwa kane taliki ya 29/03/2012. Ababyeyi, abana n'abarezi bari bitabiriye ibirori byo gusoza igihembwe.Ibyo birori byasusurukijwe n'udukino tw'abana kandi hanatangwa indangamanota.
IMIKINO N'IMYIDAGADURO
Nyuma y'ibizamini bisoza igihembwe cya mbere 2012, kuwa mbere tariki ya 26/03 habaye umukino w'intoki "Volley-Ball" wahuje abanyeshuri n'abarezi. Nyuma y'uwo mukino habaye ubusabane. Muri ubwo busabane umunyeshuri uhagarariye abandi "Doyen" yahamagariye bagenzi be kurangwa n'imyifatire myiza (Discipline) kuko ariyo nkingi y'uburezi.
ABABYEYI BAGOMBA GUFATANYA N'UBUYOBOZI BW'IKIGO KURERA
Ubufatanye bw'ababyeyi n'ubuyobozi bw'ikigo mu kurera abanyeshuri ni ngombwa. Iyo abanyeshuri bamwe bafite ibibazo, hari igihe biba ngombwa ko ababyeyi cyangwa ababarera batumizwa kugirango barebere hamwe n'ubuyobozi icyakorwa. Benshi mu babyeyi bitabira ubutumire bakaganira n'ubuyobozi bw'ikigo ndetse n'abana babo. Ubu bufatanye mu burezi ni ubwo gushyigikirwa no gushimwa.
Muri G.S. BUTARE CATHOLIQUE umwana aba anezerewe akanisanzura. Hatangirwa uburezi bwuzuye kandi bufite ireme. Muzaze namwe mwihere ijisho. 
Muri G.S.BUTARE CATHOLIQUE abarezi bitabiriye gukoresha mudasobwa mu gutunganya amanota y'abanyeshuri. Bifuza ko za mudasobwa zaba nyinshi kugirango buri wese abe yabona iyo akoresha mu gutunganya umurimo Imana na Leta y'u Rwanda bamushinze. ( Jean Baptiste NIYONSHUTI, Umuyobozi ushinzwe amasomo)